
- Tíðindi, mentan og ítróttur
Metstór føroysk luttøka á viðurkenda The Great Escape Festivalinum

Føroyar hava í fleiri ár verið væl umboðaðar á viðurkenda showcasefestivalinum The Great Escape. Hetta kundi síggjast í tónleikadokumentarinum "Always Outnumbered, Never Outgunned", sum bleiv vístur í sjónvarpinum herfyri.
Tískil fegnaðist føroyska tónleikaútflutningsstovan, Faroe Music Export (FMX), móti ársenda í fjør, at Føroyar vórðu valdar av The Great Escape til at vera fokusland í ár.
Sum kunnugt varð henda kunngerðin tíverri tikin aftur av politiskum orsøkum bert eina viku seinni, tá grindadrápið bleiv brúkt móti føroyskum tónleikarum, og eigarin av festivalinum bakkaði fyri trýstinum.
Sí eisini: The Great Escape strikar Føroyar sum fokusland orsakað av grindadrápinum
Ómetaliga væl umboðað
Hóast hetta bakkastið, so kann FMX í dag avdúka, at Føroyar kortini verða ómetaliga væl umboðaðar á The Great Escape í 2025.
Heili átta tónlistafólk og -bólkar úr Føroyum fara at luttaka, og tað er met.
Tónlistafólkini og bólkarnir, sum nú eru váttaðir og kunngjørdir til festivalin, eru:
- Eivør
- Tamara Mneney
- Elinborg
- Jazzygold
- Silvurdrongur
- Joe & The Shitboys
- Ragnar Finsson
- Aggrasoppar
"Vit eru ótrúliga fegin um, at framgongdin heldur fram," sigur Glenn Larsen, leiðari fyri Faroe Music Export (FMX).
"The Great Escape er ein týdningarmikil pallur, sum kann styrkja føroyska tónleikaútflutningin, og áhugin fyri Føroyum og okkara tónleikaídnaði veksur støðugt. Hóast samstarvið við festivalin um framtakið fyri Føroyar í 2025 ikki gekk sum ætlað, gleða vit okkum nú til at vísa okkum fram í mai."
"The Great Escape er ein týdningarmikil pallur, sum kann styrkja føroyska tónleikaútflutningin, og áhugin fyri Føroyum og okkara tónleikaídnaði veksur støðugt."
Glenn Larsen, leiðari fyri Faroe Music Export (FMX)
Eivør spælir á størsta pallinum
Glenn Larsen vísir á, at tað eru fleiri orsøkir til, at føroysk tónleikanøvn verða boðin aftur til The Great Escape.
"Tá vit upprunaliga gjørdu avtalu um, at Føroyar skuldu vera fokusland, fóru vit beinanvegin undir at menna hugskot saman við festivalinum um, hvat skuldi henda. Nøkur av hesum hugskotum verða framvegis framd, hóast tingini ikki gjørdust heilt sum ætlað," greiðir hann frá.
Eivør spælir til dømis eina stóra konsert á einum av teimum størstu pallunum, meðan Joe & The Shitboys eru valdir at kuratera sítt egna konsertkvøld, har teir velja tríggjar aðrar útlendskar bólkar at spæla á sama palli.
"Hetta kvøldið er kanska serliga ætlað LGBT-umhvørvinum, men tað er opið fyri øllum. Vit kunnu venda tí við og kalla tað eitt "straight-vinaligt "-tiltak, sum er heilt í andanum hjá Joe & The Shitboys," greiðir Glen Larsen, leiðari í FMX, frá.
Tað gleðiliga hendi á The Great Escape í 2024, at Aggrasoppar tóku øll á bóli og vunnu Steve Strange-heiðurslønina. Hetta gjørdi tað sjálvsagt fyri festivalin at bjóða teimum aftur í ár.
"Hetta er eitt stórt góðskustempul, sum fer at lata fleiri dyr upp fyri teimum.”
Glenn Larsen, leiðari í FMX (Mynd: Bjarni Árting Rubeksen)
Øll framføra tvær konsertir hvør
Elinborg er longu kunngjørd sum ein partur av "First Fifty"-listanum. Stutt sagt merkir hetta, at hon er millum tey fyrstu 50 tónlistafólkini, sum vórðu kunngjørd, og hetta vísir greitt, at bookingbólkurin á festivalinum veruliga trýr upp á hana sum tónlistafólk.
"Tá talan er um Jazzygold, hevur festivalurin lagt merki til hennara jaligu menning seinastu tvey árini. Samstundis hevur hon givið sína debut-EP út áðrenn festivalin, og hetta hevur við sær, at bookingbólkurin nú hevur boðið hana aftur til festivalin,” greiðir Glenn Larsen frá.
Ragnar Finsson, Tamara og Silvurdrongur eru øll nýggj fyri altjóða áhoyrarar og tónleikavinnuna, men FMX-leiðarin eri sannførdur um, at tey eru klár til næsta stigið og fara at fáa nógv burturúr showcasefestivalinum.
Øll tey føroysku listafólkini fara at framføra tvær konsertir hvør, báðar sum part av almennu festivalsskránni. Afturat konsertunum verður ein vinnuráðstevna við áhugaverdum pallborðum, viðkomandi kjaki, høvuðsrøðum og góðum møguleikum fyri netverkan.
Ein stórur hópur úr føroysku tónleikavinnuni verður væntandi við á festivalinum.