FMA-heiðurslønirnar verða handaðar í kvøld

Í kvøld verður stóra kvøldið á føroyska tónleikapallinum, tá ársins bestu avrik innan føroyskan tónleik verða heiðrað til FMA, sum verður í Varpinum í Klaksvík

Uni L. Hansen

21.03.2025 - 08:14

Hvør var besta tónleikaútgávan, sum bleiv útgivin í 2024? Hvør var besti sangurin? Og hvør var mest spennandi nýggi tónleikaspírin, ið spratt í farna árinum?

Hetta og nógv annað fæst svar upp á klokkan 20 í kvøld, tá føroyska tónleikaumhvørvið fagnar bestu avrikini á heimliga tónleikapallinum hetta farna árið.

Tað hendir á Faroese Music Awards 2025, FMA, sum í ár fyri fyrstu ferð er flutt úr Norðurlandahúsinum og út um Havnina, tí tiltakið verður í nýggja og stásiliga Varpinum í Klaksvík.

Sent og stroymt beinleiðis

FMA er samstarv millum Tónleikasamband Føroya og Kringvarp Føroya.

Tí verður FMA 2025 sent beinleiðis í sjónvarpinum, umframt at tiltakið eisini verður stroymt her á heimasíðu Kringvarpsins, har nógv annað tilfar um FMA eisini verður at lesa.

12 heiðurlønir verða handaðar, og sjey tónleikaframførslur eru á skránni.

Tær 12 heiðurslønir eru:

Ársins útgáva
Ársins serútgáva
Ársins sangur
Ársins tónaskald
Ársins spíri
Ársins tónleikari
Ársins tekstur
Ársins myndlistarligi samleiki
Ársins útflutningsvirðisløn
Ársins átak
Áhoyraravirðislønin
Ársins Tónleikaheiður

>>Hvørji tey tilnevndu eru í øllum bólkunum sæst HER.

FMA-tilnevningar, FMA-heiðurslønir, FMA 2025

Frítekst tagging:
FMA-tilnevningarnar
FMA-heiðurslønir
FMA 2025
Bjarni Árting Rubeksen

Útgávan "Seinferð" hjá Leu Kampmann er tilnevnd til ársins útgávu (Mynd: Bjarni Árting Rubeksen)

Størstur spenningur um ársins útgávu

Sum altíð, so er størstur spenningur um, hvør átti bestu útgávuna í farna árinum.

Spenningurin hevur kanska ongantíð verið størri, tí 2024 var eitt krútsterkt útgávuár. Tað er líka við, at 2024 er sterkasta útgávuárið nakrantíð.

Tey tilnevndu til ársins útgávu eru:

Brimheim - "Ratking"
Eivør - "Enn"
Lena Anderssen - "State of the Land"
Hamferð - "Men Guðs Hond Er Sterk"
Lea Kampmann - "Seinferð"

Allar tær fimm pláturnar hava verið umrøddar í sendingini LEITISSTEIN, sum kann hoyrast á KVF Ljóð.

>>Hoyr eisini: LEITISSTEIN 18.03.2025 (FMA 2025)

Jens L.Thomsen, FMA-tilnevningar, FMA-heiðurslønir, FMA 2025

Frítekst tagging:
FMA-tilnevningarnar
FMA-heiðurslønir
FMA 2025
Bjarni Árting Rubeksen
Jens L. Thomsen

Jens L. Thomsen og Aron Højgaard (Mynd: Bjarni Árting Rubeksen)

Fyrsta FMA-heiðurslønin longu handað

Fyrsta FMA-heiðurslønin, fyri at hava gjørt ársins FMA-jinglu, er longu handað. Tað bleiv hon, tá allar FMA-tilnevningar blivu kunngjørdar í Norðurlandahúsinum fyrr í ár.

Heiðurin fyri ársins FMA-jinglu vunnu blaðungi Aron Højgaard og hin durkdrivni Jens L. Thomsen.

>>Sí eisini: Starvsnæmingurin og lærumeistarin hava saman gjørt ársins FMA-jinglu

Sjey tónleikaframførslur eru á skránni

Rannvá Fossaberg og Jákup Dahl, ið flest føroyingar kenna frá Góðan morgun Føroyar í útvarpinum, verða vertir til FMA í Varpinum, frásøgufólk í sjónvarpinum verður Gunnar Nolsøe, og Eyðun Müller Thomsen er framleiðari.

FMA verður sent og stroymt beint eftir Gekkin, ið er framskundaður, klokkan 20, og tiltakið varir smáar tveir tímar, tí umframt at 12 FMA-heiðurslønir skulu handast, so verða sjey tónleikaframførslur á skránni.