Morgunkórið - ein verkætlan, sum ikki vildi enda

​Alt byrjaði í Kaffihúsinum í Havn ein fyrrapart fyri 10 árum síðani, tá Morgunsendingin stílaði fyri hugaroki. Endamálið var at finna nýggj konsept til sendingina.

Heidi Lava Elgeirsdóttir, sum var í toyminum tá, segði brádliga: - Hví ikki stovna eitt nýtt kór?

Tankin var loftaður og soleiðis mentist hugskotið um Morgunkórið.

Verkætlanin snúði seg um at gera eitt kór við púra óroyndum sangarum og geva teimum møguleika at venja við kórleiðara í 12 vikur. Finalan skuldi vera konsert i Kringvarpinum.

Sigrið Sivertsen var spurd, um hon hevði hug at royna. Hon hugsaði um fyrispurningin eina nátt og tók síðani av.

sigrid_1.5.1.png

Undirtøkan var sera góð. Fleiri enn 100 sangarar møttu upp á Reinsarínum, har fyrsta venjingin var.

Kórleiðarin ásannar, at hetta var ein rættiliga stór uppgáva, tí tey flestu høvdu ógvuliga avmarkaðar sangroyndir.

Tey vóru tó ágrýtin og hugað at læra, og tí gingu venjingarnar væl.

12 vikur seinni var vælfagnað konsert hildin í Kringvarpinum. Stúgvandi fult av fólki var komið saman at uppliva sangglaðu amatørarnar, og semja var um, at tey høvdu tikið seg nógv fram.

Nú var verkætlanin í grundini liðug, men tað gjørdist skjótt greitt, at morgunsangararnir als ikki høvdu hug at gevast.

Sigrið Sivertsen hevði fleiri aðrar bóltar í luftini, men kortini játtaði hon at halda fram.

Nú, 10 ár seinni, syngja tey framvegis, Enn sum áður er sanggleði og felagsskapur tað, ið ger, at tey hugagóð hittast hvørja viku í Skúlanum við Løgmannabreyt.

malan_1.7.1.png

Hóskvøldið eftir Dag og viku sendir Kringvarpið nýggjan heimildarfilm um Morgunkórið. Har fylgja vit teimum í venjingunum fram ímóti 10 ára hátíðarkonsertini á Finsen.