Fegnir vinnarar á Ítróttafagnaðinum

Evropameistarin stjørnuskotið

Jónas Gunnleivsson Isaksen hevði eitt frálíkt 2023, har hann millum annað gjørdist U20-evropameistari í 400 metra renning. Tá hann ikki vann størsta heiðurin, fór hann ikki óvæntað avstað við Stjørnuskotinum 2023.

 - Tað er skeg at fáa okkurt afturfyri tíðina, sum mann hevur brúkt úti í regni og vindi og stormi, segði rennarin úr Kvívík.

Heri Ziska vann nýggjan heiður

Ítróttavenjarin var latin fyri fyrstu ferð, og tann heiðurin fór Heri Ziska avstað við. Venjarin í Hvirluni er ein ímynd av frælsum ítrótti í Føroyum, har hann hevur verið við í fremstu røð bæði sum íðkari og venjari, og hann fegnaðist um viðurkenningina.

Alt fyri TB

Ítróttaeldsálin 2023 fór til Eyðdis Ellendersen, sum hevur tikið sær av alskyns uppgávum í TB í meir enn 20 ár. Hon kom upp í nevndina í 2023, og síðan hevur hon selt atgongumerki, lutaseðlar, kaffi, lisið bingotøl. Hon var eisini forkvinna eitt skifti. 

 - Alt fyri TB, var greiði boðskapurin hjá henni, tá hon tók ímóti virðislønini í Løkshøll.

B71 besti felagsskapurin

Besti ítróttafelagsskapurin var B71 kosin at vera. Felagið á Sandi er kanska best kent fyri fótbóltin, men fevnir eisini um hondbólt og flogbólt. 

 - Sjálvboðin og eldsálir, tær hava vit nógvar av, og eg trúgvi, at øll koma at síggja, hvønn týdning tað hevur at vera ein partur av hesum felagsskapinum, segði formaðurin ígjøgnum nógv ár, Karl Vidtfeldt.

Sólstrálurnar koma úr Neistanum

Ein annar nýggjur heiður, sum var latin á Ítróttafagnaðinum hesa ferð, er Sólstrálan 2023. Hann verður latin til ung undir 20, sum gera eitt stórt arbeið í ítrótti onkursvegna.

Tað vóru blaðungu Gyða B. Djónadóttir og Johanna Østerø í Neistanum, sum fingu hendan heiðurin. Tær bæði spæla og venja yngri gentur í hondbóltsfelagnum, og tær hjálpa eisini fegnar til, tá tørvur er á tí í samband við dystir og annað.

 - Eg veit ikki, hvat eg skal siga. Hetta er so stórt og stuttligt, segði Gyða B. Djónadóttir.