Ítróttafelagsskapurin: Mjølnir, HSF ella B71

Mjølnir, Hondbóltssamband Føroya og B71 eru í uppskoti til virðislønina 'Ítróttafelagsskapurin 2023', sum verður latin á Ítróttafagnaðinum í Løkshøll leygarkvøldið 10. februar.

Hendan heiðurslønin verður latin til eitt vælvirkandi felag ella samband, sum ger eitt gott ítróttaligt og samfelagsligt arbeiði.

Mjølnir, HSF og B71

 - Mjølnir er eitt fevnandi felag, sum er sjónligt í lokalumhvørvinum, verður sagt í tilnevningini. Felagið bjóðar venjing til allar aldursbólkar, umstøðurnar eru góðar og Mjølnir hevur seinastu árini gingið á odda við millum annað at melda seg til evropeisku flogbóltskappingarnar. 

 - B71 er av sonnum ein savnandi felagsskapur fyri alla Sandoynna. Her eru bæði børn og vaksin virkin, og flestu fólk í oynni munnu onkursvegna hava eitt tilknýti til felagið, verður sagt um felagið, sum helst er best kent fyri fótbólt, men eisini fevnir um flogbólt, hondbólt og futsal.

Hondbóltssamband Føroya hevur seinastu árini arbeitt miðvíst við menning av hondbólti, og úrslitini hjá føroyskum landsliðum síðstu árini - ikki minst til EM-endaspælið í Týsklandi fyri kortum, hava verið frálík. - Øll hesi úrslitini eru bygd á eina breiddarhugsan, sum sigur, at um tað er stuttligt fyri øll at spæla
hondbólt, samstundis sum vit menna talentini, fara úrslit at spyrjast burturúr, verður sagt í tilnevningini.