Kommunan í Sjóvinnuhúsið og Setrið á Frælsið

Tórshavnar býráð samtykti einmælt í gjár avtaluna við Mentamálaráðið um at selja landinum tey 40 prosentini, sum Tórshavnar kommuna eigur í Venjingarskúlanum, og, at kommunan keypir gamla studentaskúlabygningin í Hoydølum.

Samstundis gerst kommunan leys av einum gávulyfti, sum Tórshavnar býráð í 1990 gav Fróðskaparsetrinum um at lata lendi, 50.000 fermetrar, til Fróðskaparsetur í Marknagili

Avtalan ruddar slóð fyri, at landið nú kann flyta Fróðskaparsetrið á Frælsið, gera kampus har.

Hoydalar, Tórshavnar kommuna

Tórshavnar kommuna keypir gamla studentaskúlabygningin í Hoydølum.

Øll fyrisitingin í Sjóvinnuhúsið

Mentamálaráðið skal rinda Tórshavnar kommunu slakar tvær milliónir krónur, sum er munurin millum virðið á ognunum á Frælsinum og í Hoydølum.

Og Fróðskaparsetrið fær 4,2 mió. kr. í endurgjaldi fyri at flyta úr Sjóvinnuhúsinum á Frælsið í seinasta lagi við árslok 2024, nú Fróðskaparsetrið skal út haðani í ótíð.

Hetta er fyri íløgur, sum Fróðskaparsetrið hevur gjørt í Sjóvinnuhúsinum.

Tórshavnar kommuna ætlar at flyta alla sína fyrisiting í Sjóvinnuhúsið.

Venjingarskúlin

Tórshavnar kommuna selur landinum tey 40 prosentini, sum kommunan eigur í Venjingarskúlanum. 
 

Verdur 80 mió. kr.

Tann parturin av Venjingarskúlanum, sum landið og Tórshavnar kommuna eiga saman, er verdur slakar 80 mió. kr.

Tað hevur ein meklari mett í summar.

Tórshavnar kommuna eigur 40 prosent, so hennara partur er slakar 32 mió. kr. Haraftrat eigur kommunan eina lon á Frælsinum, sum er mett til 13 mió. kr.

Studentaskúlabygningurin í Hoydølum er sambært metingini 32,5 mió. kr. verdur. Lonirnar í Hoydølum eru virðismettar til 4,5 mió. kr. 

Har eru í dag dagstovnur og serskúlatilboð hjá Tórshavnar kommunu.

Lonirnar hava tíðaravmarkað loyvi frá Yvirfriðingarnevndini at standa á lendinum í Hoydølum til ársskiftið 2023/24.