Fiskaútflutningurin vaksin tvær milliardir seinasta árið

Fiskaútflutningurin vaks nærum tvær milliardir kr. frá februar í fjør til januar í ár, vísa tøl hjá Hagstovuni.

Tilsamans útfluttu vit fisk fyri umleið 10,3 milliardir kr. 

Meginparturin av vøkstrinum stavar frá størri útflutningi av laksi.  Nøgdin seinasta árið vaks 40 prosent og virðið 45 prosent.

Útflutningsvirðið á makreli er vaksið 202 milliónir kr., og virðið á sildaútflutninginum vaks 142 milliónir.

Hinvegin minkaði útflutningurin av svartkjafti niður í helvt.

Innflutningurin eisini vaksin

Innflutningurin er eisini vaksin seinasta árið. 

Hann var tilsamans 9,4 milliardir kr., ella 1,4 milliardir størri enn árið fyri.

Innflutningurin av brennievni vaks 507 milliónir kr., men verður innflutningurin av brennievni í januar samanborin við januar í fjør, er vøksturin 70 prosent. 

Innflutningurin av fiski til fiskavirking var 87 prosent størri, og innflutningurin av maskinum og aðrari útgerð til vinnulívið er vaksin 33 prosent.

Sí meira um útflutningin og innflutningin her.