Jónleif formaður í Trivnaðarnevndini

Jónleif Johannesen í Javnaðarflokkinum er nú formaður í Trivnaðarnevndini hjá løgtinginum.

Hann varð valdur fyrrapartin. 

Elsebeth Mercedis Gunnleygsdóttir í Fólkaflokkinum heldur fram sum næstforkvinna í nevndini.

Katrin Kallsberg í Tjóðveldi, sum var forkvinna, er nú vanligur nevndarlimur.

Við nevndarumskipanini í dag er kabalin hjá samgonguni, sum varð løgd, tá Hanna Jensen fór í landsstýrið fyri Rigmor Dam, liðug.

Tjóðveldi forkvinnuna í Mentanarnevndini

Óluva Klettskarð í Tjóðveldi er forkvinna í Mentanarnevndini hjá løgtinginum. 

Tað samdist nevndin um á fundi í gjár. Rigmor Dam er næstforkvinna í Mentanarnevndini.

Óluva Klettskarð hevur verið virkandi forkvinna í Mentanarnevndini, síðani Hanna Jensen í Framsókn, sum var forkvinna, fór í landsstýrið.

Rigmor Dam í Javnaðarflokkinum var í Trivnaðarnevndini og vendi, tá hon fór úr landsstýrinum. Hon fór í Mentanarnevndina.

Jónleif Johannesen er komin í Trivnaðarnevndina fyri Djóna Nolsøe Joensen, sum fór úr tinginum, tá Rigmor Dam kom hagar úr landsstýrinum.