Ósemja um nevndarsess kostaði stjórastarv

Ein ósemja millum Tórshavnar kommunu og Jákup Egholm Hansen, tekniska stjóra hjá kommununi, um nevndarsessin hjá honum í Eik Banka endaði í gjár við, at Jákup Egholm Hansen fer úr starvi sínum.

Jákup Egholm Hansen var tekniskur stjóri hjá Tórshavnar kommunu í knappliga átta ár.  

Longu tá Jákup Egholm Hansen byrjaði í starvinum hjá kommununi, hevði hann tilknýti til TF Samtakið sum limur i umboðsráðnum, har hann eisini var formaður í nógv ár, skrivar Tórshavnar kommuna í tíðindaskrivi. 

Nevndarlimur í Eik 

10.juni í ár varð Jákup Egholm Hansen valdur í nevndina hjá Eik Banka, sum er partur av TF Samtakinum.    

Tá fóru kommunan og Jákup Egholm Hansen at tosa um, antin nevndarsessurin í Eik Banka kundi forða honum í at røkja tær skyldur, sum áliggja honum sum tekniskur stjóri hjá Tórshavnar kommunu, á fullgóðan hátt, soleiðis sum ásett er í tænastumannalógini.  

Semja fekst ikki um tað, so í staðin fyri samdust partarnir í gjár um at enda samstarvið. 

Jákup Egholm Hansen fær, sambært avtaluni við kommununa, løn í sjey mánaðir. 

Sum partur av avtaluni er Jákup Egholm Hansen tó til taks hjá kommununi í avtalutíðarskeiðinum í sambandi við ítøkilig mál, sum hann hevur serligan kunnleika um, eitt nú ymsar byggiverkætlanir.