Ongin føroyingur fekk virðisløn frá Norðurlandaráðnum

Svenska Johanna Rubin Dranger fekk Bókmentavirðisløn Norðurlandaráðsins fyri sína grafisku skaldsøgu "Husk oss til livet", har hon skrivar um sína jødisku familjusøgu.

Norski mentamálaráðharrin Lubna Jaffery handaði virðislønina á Óperuni. Dómsnevndin lýsti verkið sum "overveldende og vigtigt".

Danski filmurin "Viften" vann filmsvirðisløn Norðurlandaráðsins. Frederikke Aspöck hevur leikstjórnað, og Anna Neye hevur skrivað handritið.

Filmurin snýr seg um Danmark, sum hjálandaveldi í Vestur-Indisku oyggjunum við einum absurdum, skemtiligum sniði og byggir á veruligar hendingar. Filmskapararnir fingu rós fyri teirra óvanliga greiðu visjón.

Í bólkinum fyri barna- og ungdómsbókmentir var íslendska Rán Flygenring heiðrað fyri bókina "Eldgos", sum lýsir eina familju og ferðafólk, sum eru nær einum goysandi gosfjalli. Dómsnevndin metir, at bókin er ein fjálg og skemtilig frásøgn. Flygenring er fødd í Noregi, men býr í Íslandi.

Finska Maija Kauhanen fekk tónleikavirðislønina fyri sítt fjølbroytta megnararbeiði í tónleikaheiminum. Hon hevur skapt sær eitt navn á altjóða pallinum, og dómsnevndin vísir á hennara evni at sameina siðvenju og nýggjar tónar.

Svenska felagið Renewcell vann umhvørvisvirðislønina hjá Norðurlandaráðnum fyri nýskapandi arbeiði við at endurvinna plaggburturkast.

Ongin føroyskur vinnari

Fleiri føroyingar vóru í uppskoti til virðislønir í ár.

Dánial Hoydal og Annika Øyrabø í bólkinum barna- og ungdómsbókmentir, Teitur Lassen í tónleikabólkinum og Marjun Syderbø Kjelnæs í bólkinum fyri bókmentir.

Hóast teirra framúr avrik og tilnevningar, vunnu tey tó ikki hesa ferð.