Anna Falkenberg bjóðar seg fram sum næstforfólk Sambandsfloksins

Sambandflokkurin hevur landsfund í Salti í Ørðavíkarlíð í morgin. Eftir skránni skal landsfundurin velja formann og næstformann í landsfelagi Sambandsfloksins. 

Bárður á Steig Nielsen er formaður og Helgi Abrahamsen er næstformaður í Sambandsflokkinum. Eingin stillar upp í móti formanninum, men Helgi Abrahamsen fær ein avbjóðara, og tað er Anna Falkenberg, fólkatingslimur fyri Sambandsflokkin. 

Skipanin er tann, at tey, sum sita í hesum sessum, skulu ítøkiliga boða frá, um tey ikki stilla uppaftur, og tað hevur Helgi Abrahamsen ikki gjørt.

Tveir nevndarlimir í Føroya val, sum er valfelagið í Suðurstreymoy, hava skotið upp at velja Onnu Falkenberg til næstforfólk. Fólkatingslimurin hevur játtað at vera valevni.

Tá útvarpið spyr hana, um tað er eitt tekin um, at hon verður á listanum hjá Sambandsflokkinum til komandi løgtingsval, er svarið, at tað vil hon hvørki vátta alla avsanna.

Hon sigur, at tað er avtalað í flokkinum, at einki verður sagt, fyrr enn eftir næstformansvalið í morgin.

Anna Falkenberg fekk nógv flest atkvøður á sambandslistanum á fólkatingsvalinum í 2022. Hon fekk 2971 atkvøður. Næstur henni var Johan Dahl, sum fekk 784 atkvøður.

Fólkatingslimurin stilaði uppp til løgtngsvalini í 2015 og 2019, tá ávikavist 38 og 167 veljarar settu kross við navn hennara. 

Landsfundurin byrjar klokkan hálvgum tíggju í morgin.

Gestarøðari er Troels Lund-Poulsen, danskur verjumálaráðharri og formaður í flokkinum Venstre.