Andstøðuflokkarnir leggja fram misálit

Teir tríggir andstøðuflokkarnir fara at leggja fram uppskot um misálit á Ingilín Didriksen Strøm, landsstýriskvinnu, á tingfundinum í dag

Bárður á Steig Nielsen, formaður í Sambandsflokkinum, sigur við VP, at formenninir í andstøðuflokkunum leggja uppskotið fram. 

Tingfundurin byrjar klokkan 11, og fyrsta mál á skránni er 3. viðgerð av uppskoti um floksstuðul, síðani eru munnligir fyrispurningar og umrøða av spurningi hjá Bárði á Lakjuni um skíggjatíð, snildfon og sosialir miðlar.

Tá uppskot um misálit verður lagt fyri tingið, mugu onnur mál á dagsskránni víkja, og misálitið verður viðgjørt fyrst.  

Meirilutin í landsstýrismálanevndini broytti týsdagin støðu og vildi hava ein kanningarstjóra at kanna embætisførsluna hjá landsstýriskvinnuni.

Men hesum taka andstøðuflokkarnir ikki undir við. Teir hava biðið løgmann um sjálvur at loysa landsstýriskvinnuna úr starvi fyri tingfundin í dag, tá misálit annars verður reist.

Andstøðan hevur ikki meiriluta í løgtinginum, og tí er tann stóri spurningurin, um allir samgongulimirnir standa saman um Ingilín D. Strøm, og tí ikki atkvøða fyri einum misáliti.