Heimskendur Youtubari: Smakkurin av grind er eitt eindømi

Sonny Side eitur dámligi verturin á væl umtóktu matrásini á Youtube "Best Ever Food Review Show".

Best Ever Food Review Show

Sonny Side, ið neyvan er hansara kristna navn, ferðast til allar krókar í heiminum, fyri at royna sjáldsaman mat.

Hann leggur tó ikki fingrarnar ímillum í øðrum parti frá síni Føroyaferð, ið júst er lagdur út á Youtube. 

"Grind er mest umstríddi matur í Evropa," staðfestir hann. 

Best Ever Food Review Show, Grind

Eitt eindømi

Sonny staðfestir tó eisini, fullkomiliga uttan fordómar og at snerkja einaferð, at smakkurin av grind er eitt eindømi. 

"Eingin matur, ið eg áður havi roynt, smakkar eins og grind. Tí skilji eg skilji væl, at tit føroyingar halda fast um rættin at drepa og eta grind," sigur amerikumaðurin, ið hevur út við 10 milliónir fylgjarar á Youtube. 

Best Ever Food Review Show

Heima hjá Súsonnu og Eyðuni

Í øðrum partinum, sum hevur fingið heitið "Hunting and Eating Whale!! Europe’s Most Controversial Food!!", er Sonny heima hjá Súsonnu og Eyðuni í Kvívík og roynir fleiri ymiskar grindarættir

Best Ever Food Review Show

Súsanna og Eyðun er sera væl egnað til uppgávuna, tí tey eru bæði sera sympatisk og duga væl at greiða frá um siðvenjuna at eta grind. 

Best Ever Food Review Show, Grind

Á síni vitjan heima hjá Súsonnu og Eyðuni sleppur Sonny at royna bæði feska og turra grind, umframt at hann eisini fær grindabúffar. 

Best Ever Food Review Show

Serliga Súsanna er fyrikomandi og ikki sørt sjarmerandi, og tað er eyðsæð, at Súsanna og Sonny finna væl út av tí saman.  

Hugtakandi lýsing av grind

Burturúr er komin ein sera hugtakandi lýsing av serliga føroyska fyribrigdinum grind. 

Hjá okkum føroyingum er tað gleðiligt loksins at síggja ein útlending, ið veruliga hevur sett seg inn í siðvenjuna við eta grind og skilir støðu føroyinga. 

Annar partur av vitjanin hjá Sonny og "Best Ever Food Review Show" kann síggjast her niðanfyri.