Skeinkistøð fáa nú hjálparpakka

Skeinkistøðini, sum virdu tilmælini frá 9. desember um at lata aftur kl 23, fáa nú ein hjálparpakka.

Umhvørvis- og vinnumálaráðið hevur í dag sent lógaruppskotið til hoyringar.

Tey, sum kunnu fáa stuðul frá landinum, eru fyritøkur, sum reka dansi- og skeinkistøð.

Fyritøkurnar kunnu søkja um stuðul til fastar útreiðslur, eitt nú leigu, el, hita, tryggingar, grannskoðaraváttan og lønarútreiðslur, sum  eru goldnar bæði fastløntum og tímaløntum í stuðulstíðarskeiðnum.

Landsstýrið setur tó sum treyt fyri at fáa stuðul, at fyritøkan í stuðulstíðarskeiðnum hevur latið aftur í seinasta lagi kl. 23. Stuðulstíðarskeiðini eru býtt sundur, so fyritøkurnar, sum hava havt opið longri ein part av tíðarskeiðnum, ikki kunnu søkja um stuðul tað tíðarskeiði.

Boðini frá landsstýrinum um at stongja kl. 23 fullu ikki í góða jørð, tá ið tey komu í desember, og skeinkistøðini umhugsaðu at hava opið kortini. 

100 prosent stuðul

Men eftir fund við landsstýrismannin í vinnumálum, Magnus Rasmussen, fingu skeinkistøðini vissu fyri, at landsstýrið eftir nýggjár fór at leggja uppskot fyri løgtingið um munagóðan hjálparpakka til vinnuna. 

Í hesum hjálparpakkanum veitir landið stuðul til 100 prosent av føstu útreiðslunum hjá fyritøkunum. 

Tó kunnu lønarútreiðslurnar ikki vera størri enn 27.000 kr. fyri hvørt starvsfólk, og grannskoðaraútreiðslurnar eru avmarkaðar til 10.000 kr.

Endaliga stuðulstíðarskeiðið verður nærri ásett av landstýrismanninum vegna skiftandi koronustøðuna.