Munandi dýrari at gista á Ibisa um summarið

Í fjør varð sett í gildi serligt ferðavinnuavgjald á Balear-oyggjunum í Miðjarahavinum, - eitt nú Mallorka, Menorka og Ibiza. 

Avgjaldið er nú um 2 evrur (uml. 15 krónur) um dagin fyri hvønn vaksnan útlending fyri náttina, og metta varð, at inntøkan av tí fór at gerast væl omanfyri 600 miljónir krónur.

Men nú hækkar miðalavgjaldið upp í tríggjar evrur um dagin (góðar 22 krónur), og tey, sum gista á góðu gistingarhúsunum skulu rinda fýra evrur um dagin (30 kr.) í avgjaldi fyri hvønn vaksnan persón, skrivar Daily Mail.

Øll skulu rinda

Nýggju avgjøldini fevna eisini um ferðafólk, sum vitja oyggjarnar við ferðamannaskipi. Tey skulu nú rinda tvær evrur fyri hvønn persón. 

Kampistar skulu rinda eina evru, og gestir á gistingarhúsum uttanfyri býirnar rinda tvær evrur í avgjaldi fyri náttina.

Hækkingin av ferðaavgjaldinum kemur í gildi í 2018 og fevnir um øll ferðafólk, sum eru 16 ár og eldri, og sum vitja í oyggjunum summarmánaðirnar, - mai til oktober.

Dýrari fyri barnafamiljur

Tað merkir, at ein persónur, sum næsta summar gistir á góðum gistingarhúsi í tvær vikur, skal rinda tilsamans 420 krónur í avgjaldi. Fyri barnafamiljur við vaksnum børnum kann talan sostatt verða um nakrar túsund krónur í avgjaldi.

Myndugleikarnir rokna við næsta ár at fáa 860 miljónir krónur í inntøku. 

Næst eftir Katalonia eru Balear-oyggjarnar, Mallorka, Menorka og Ibiza, mest vitjað í Spania.