Kunnu skjótt ala í trimum nýggjum støðum

Í góðkenningini er serligur dentur lagdur á, at evni, ið nýtt verða í alivirkseminum, ikki skaða umhvørvið. Umhvørvisstovan hevur eisini sett treytir við góðkenningina.

Millum annað skal Bakkafrost Farming gera regluligar kanningar av botninum undir aliringunum, og úrslitini skulu brúkast sum grundarlag undir framtíðarætlanum hjá felagnum.

Slepst ikki undan dálking

Umhvørvisstoavn kann seta forboð fyri at seta fisk út, um talan er um ov stóra dálking. Umhvørvisstovan sigur kortini, at tað ikki slepst heilt undan dálking, eitt nú frá fóðri og skarni.

Eisini kann dálking stava frá heilivági og evnum, ið nýtt verða at verja aliútgerð við, sigur Umhvørvisstovan.

Umhvørvisgóðkenningin hjá Bakkafrosti kann kærast, sambært Umhvørvisstovuni. Kærufreistin er sett til mikudagin 2. september.