Havnin missir níggju prosentstig í atkvøðum

Tórshavnar kommunu missir atkvøður á borgarstjórafundi, um uppskotið um nýggjar viðtøkur hjá Kommunufelagnum verður samtykt á eykaaðalfundi hjá felagnum í dag.

Tórshavnar kommuna hevur nú góð 42 prosent av atkvøðunum, men fer niður í góð 33 prosent.

Uppskotið er, at á borgarstjórafundi hevur hvør kommuna eina atkvøðu fyri hvørji byrjaðu 1.000 fólk í kommununi.

Nú hevur hvør kommuna eina atkvøðu fyri hvørt fólkið í kommununi. 

Á býráðsfundi í Havn í gjár atkvøddi býráðið ímóti hesi broyting.

Borgarstjórafundur

Í staðin fyri, at stýrið við 13 limum er ovasta leiðsla felagsins í málum, sum ikki skulu viðgerast á aðalfundi, verður ein borgarstjórafundur seks ferðir um árið, har allir borgarstjórar hava rætt til at møta.

Á aðalfundi verður tó framvegis atkvøtt sum nú, tað er ein atkvøða fyri hvørt fólkið í kommununi.

Ein onnur broyting er, at borgarstjórarnir í øllum 29 limakommununum fáa rætt til at koma á stýrisfund.

Men borgarstjórar, sum ikki hava fólk í stýrinum, sleppa ikki at atkvøða á stýrisfundunum.

Ein annað uppskot um broyting er, at starvsbólkurin dettur burtur. 

Formansskapur

Forfólkið og næstforfólkið, sum borgarstjórafundurin velur, eru saman við forfólkinum í starvsnevndini fyri Kommunala arbeiðsgevarafelagið formansskapurin í Kommunufelagnum. 

Formansskapurin hevur fund eina ferð um mánaðin. Hann avger mál, sum ikki skulu viðgerast á 
borgarstjórafundi ella aðalfundi.

Ikki er ásett i viðtøkunum, hvørji mál krevja borgarstjórafund, og hvørji formansskapurin kann avgreiða.

Borgarstjórarnir í Havn, Runavík og Eysturkommunu og Eyðun Christiansen, stjóri í Kommunufelagnum, og Janus Haraldsen, løgfrøðingur í Kommunufelagnum gjørdu uppskotið um nýggjar viðtøkur hjá Kommunufelagnum.