Russiskir leiguhermenn royna at fáa vápn úr Kina

Hernaðarligi russiski bólkurin við leiguhermonnum, Wagner-herurin, hevur roynt at útvega sær vápn úr Kina.

Eitt loyniligt stemplað skjal, sum herfyri var likið frá Pentagon, vísir, at Kina ikki svaraði fyrispurninginum frá Wagner-deildini. 

Financial Times hevur sæð skjalið, sum er likið úr amerikanska verjumálaráðnum, og sambært blaðnum, var fyrispurningurin frá Wagner-deildini sendur tíðliga í ár.

Wagner-deildin, sum er ein privatur herur við Jegenij Prisozjin á odda, er víðagitin fyri ráa leiklut sín í Ukraina.

Sambært skjalinum, hava umboð fyri Wagner "biðið um lóður og útgerð" úr Kina, skrivar blaðið.

Men tíðliga í januar hevði Kina ikki sent vápn, og hevði heldur ikki havt samband við Wagner um vápnasending, stendur í skjalinum, sambært blaðnum.

USA hevur skuldsett Kina fyri at hava ætlanir um at senda Russlandi vápn, men eingi prógv eru um tað.

Hjálpa við tøkni

Men sambært Wall Street Journal, hjálpir Kina í tí dulda Russlandi við tøkni, sum Kreml hevur tørv á í krígnum í Ukraina, hóast altjóða tiltøk og útflutningseftirlit.

Kina og Russland hava seinastu árini, og eftir kríggið, sagt, at tey styrkja fíggjarliga og hernaðarliga samstarvið sínámillum.

Hvørki Kreml ella Beijing hava svarað spurningum frá Financial Times, um upplýsingarnar hjá fregnartænastuni eru sannar, um at Wagner-deildin royndi at útvega sær vápn úr Kina.

Wagner-deildin hevur, sambært skjalinum, kortini megnað at fingið vápn frá tveimum sameindum hjá Russlandi, Hvítarusslandi og Sýria. 

Deildin skal eisini hava samskift við Turkaland um at keypa vápn frá teimum, men Turkaland hevur noktað teimum tað.