Ongar viðmerkingar frá myndugleikunum enn

Føroyskir myndugleikar vilja ikki gera viðmerkingar enn til tíðindini, sum eru komin fram í nýggju heimildarsendingini hjá NRK, SVT, YLE og DR, um at russisk fiskiskip eftir øllum at døma bæði fremja njósnaravirksemi og fíggindasinnað virksemi í Norðurlondum.

Tað hevur ikki borið til hjá Kringvarpinum at fingið fatur á løgmanni.

Høgni Hoydal, landsstýrismaður í uttanríkismálum, vil ikki gera viðmerkingar enn.

Bjarni Kárason Petersen, sum er landsstýrismaður í lógarmálum, sigur, tá ið hann verður spurdur, hví Føroyar ikki, eins og Noreg hava sett í verk krøv um, at russisk skip, sum koma til landið, skulu kannast av løgregluni, at hann má kanna spurningin nærri, áðrenn hann kann svara hesum.