Seinnu hálvfinalurnar: H71 trý mál frammanfyri samanlagt

Bæði kvinnu- og mansliðini hjá H71 hava lítlan fyrimun, tá tey taka ímóti ávíkavist Neistanum og KÍF í seinnu hálvfinalunum í steypakappingini í dag.

Maria H. Weyhe avgjørdi fyrra dystin ímóti Neistanum mikukvøldið við málið til 22-21 í evstu løtu, og tí fer H71 á vøllin í Hoyvíkshøllini við lítlum fyrimuni. Fyrra hálvfinalan vísti kortini, at lítið er ímillum liðini, og at heimavallarfyrimunurin ikki neyðturrviliga verður avgerandi.

Dysturin millum H71 og Neistan verður vístur í sjónvarpinum klokkan 16.55.

Kollfirðingar stóra avbjóðing

Munurin hjá monnum er ikki nógv størri undan avgerandi dystinum í dag. H71 fekk hálað ein 23-21 sigur í land í Kollafirði, og eftirsum KÍF hevur tapt báðar sínar landskappingardystir í Hoyvík í ár, er okkurt, sum bendir á, at hoyvíkingar enda í steypafinaluni.

Kringvarpið stroymir mansdystin á kvf.fo klokkan 18.55.

Faxe Kondi-steypakappingin, seinnu hálvfinalur

Leygardag 15. februar
Kl. 17.00 H71 - Neistin, kvinnur (KvF-sjónvarp)
Kl. 19.00 H71 - KÍF, menn (kvf.fo)