Sivert Høyem í Norðurljóði: "Eg gleði meg nógv at koma til Føroya"

Nýggjasta Norðurljóð'-sendingin er serlig, tí hon viðgera eina einstaka, nýggja útgávu.

Sivert Høyem, sangarin í norska bólkinum Madrugada, kom fíggjadagin við áttandu soloútgávu síni, "Dancing Headlights".

Í Norðurljóði prátar Ragnar A. Jacobsen, vertur, við Sivert Høyem um útgávuna, og eisini um solokonsertina við Høyem, sum verður í Løkshøll í Runavík fríggjakvøldið 28.februar.

Myndir: Andreas Hornoff

Sivert Høyem

Innspæld live

Sivert Høyem greiðir frá, at "Dancing Headlights" í stóran mun er innspæld live í eini smáttu í Myrdalen, og miðað var eftir at fáa skapt nøkur stutt og einføld poppløg, sum kundu standa einsamøll.

Her verður hugsað um løg, ið eru skrivað eftir góða, gamla poppfrymlinum.

"Tað er bara ein popp-pláta. Ikki so nógv meira at siga um tað. Upp í ein neva av væl skipaðum poppsangum, ið eru tiknir upp upp á gamla mátan saman við bólki mínum," staðfestir Sivert Høyem. 

Sivert Høyem

Týdningurin av poppi broyttur

Sivert Høyem ger vart við, at poppur ikki er tað sama í dag, sum tað var, tá hann vaks upp.

"Í dag eru poppsangir forritaðar rytmir, eftirgjørd ljóð og autotune. Sangarin, sangskrivarin og framleiðarin eru sjáldan tann sami persónurin í dag. "Dancing Headligts" eru fimm fýrar, ið spæla live í upptøkuhølinum," staðfestir hann. 

"Poppur hevur ein annan týdning fyri meg," leggur Sivert Høyem afturat. "Tá eg var barn, so spældi tey framvegis The Beatles í útvarpinum. Áttatiárini vóru eisini ein deilig tíð fyri popp- og rokktónleikin, og eg hevði júst tann rætta aldurin, at súgva alt til mín. Í dag tykist tað mær trupulari at fáa eyga á nøkur ektað popplistafólk at spegla mær í. Lana del Rey er ein. Hon er tíðarleys uttan at vera gamaldags, og tað er júst tað, ið eg eisini royni at vera."

Sivert Høyem

Gleðir seg at koma til Føroya

Skjótt verður møguleiki at uppliva Sivert Høyem her í Føroyum. Fríggjakvøldið 28. februar fer hann nevnuliga á pallin í Løkshøll í Runavík.

Konsertin er fyrsta konsertin í solokonsertferð hansara, har Høyem stendur púra einsamallur á pallinum. 

"Eg gleði meg nógv at koma til Føroya at spæla konsert, og sjálvandi verður tað øðrvísi, enn um eg spæli við bólki. Tað gevur nakrar aðrar møguleikar, men eisini nakrar eyðsýndar avmarkingar," ásannar Sivert Høyem ærliga. 

Sivert Høyem

Hvat: Norðurljóð 
Hvar: Í útvarpinum og á KVF Ljóð
Nær: Mánadag kl. 16.05, og tá tað passar tær á KVF Ljóð