Reiðarafelagið: Væl nøgdir við avtaluna við Russland

- Hetta er góð avtala fyri okkum.

Tað sigur Hanus Hansen, formaður í Reiðarafelagnum og stjóri í JFK, nú Føroyar og Russland hava gjørt avtalu um sínámillum fiskiveiðirættindi fyri 2025. 

Munandi skerjingar eru í botnfiskakvotunum í Barentshavinum næsta ár. 

Toskakvotan minkar 23,8 prosent og hýsukvotan 4,5 prosent. 

Føroyska kvotan fyri flatfisk rækjukvotan verða tær somu sum í ár.

Kvoturnar í russiskum sjógvi í 2025 verða sostatt: toskur 7.445 tons, hýsa 1.000 tons, flatfiskur 900 tons og rækjur 4.000 tons. 

Hoyr innslag í útvarpstíðindunum: 

Emerald og Gadus í Båtsfjørðinum - Mynd: Båtsfjord havn

Emerald og Gadus, sum her eru avmyndaðir í Båtsfjørðinum í Noregi, fiska í Barentshavinum. 

Russisku kvoturnar av makreli og norðhavssild í føroyskum sjógvi minka eisini.

Makrelkvotan minkar 34,3 prosent, og kvotan av norðhavssild lækkar 10,6 prosent. Kvotan av svartkjafti verður óbroytt.

Russisku kvoturnar í føroyskum sjógvi næsta ár verða: Svartkjaftur 75.000 tons, makrelur 8.080 tons og sild 5.800 tons.

Russisk skip fáa næsta ár atgongd til føroyskan sjógv at fiska í mesta lagi 52.612 tons av svartkjaftakvotuni, sum russisk skip hava í altjóða sjógvi. Hetta er eitt vet minni enn í ár.nøgd í mun til 2024.

Russisk skip sleppa heldur ikki næsta ár at fiska í serøkinum hjá Føroyum og Bretlandi, skrivar Fiskimálaráðið.