Árni Skaale kærir Dennis Holm til landsstýrismálanevndina

Ein kæra um svartkjaftabýtið hjá Dennisi Holm, landsstýrismanni, er farin til landsstýrismálanevndina hjá løgtinginum.

Árni Skaale, tingmaður hjá Fólkaflokkinum og fyrrverandi landsstýrismaður í fiskivinnumálum, hevur sent kæruna.

Hann vil ikki siga nakað um hana enn, tí hon er í løtuni hjá umsitingini hjá løgtinginum.

Kæran er ikki komin á heimasíðuna hjá landsstýrismálanevndini enn.

Dennis Holm

Dennis Holm, landsstýrismaður í fiskivinnumálum, verður kærdur til landsstýrismálanevndina. 

Bíða við at stevna

Stjórin í Nótaskipum, Jógvan Jespersen, sigur, at reiðarar ella felagið bíða við møguleikanum at stevna Fiskimálaráðnum um svartkjaftabýtið, til landsstýrismálanevndin hevur avgreitt málið.

Dennis Holm hevur latið 35.000 tons av svartkjafti sum felagskvota við hámarki. 

Nótaskip halda ikki, at landsstýrismaðurin uttan nakað kann taka søgulig rættindi frá skipunum.

Um tað ber til, hvat annað kunnu vit so vænta okkum, spyr felagið.

Jógvan Jespersen

Jógvan Jespersen er stjóri í felagnum Nótaskip.

Løgfrøðingur hevur kannað málið

Felagið hevur fingið ein løgfrøðing at kanna málið.

Hansara niðurstøða er tann sama sum hjá felagnum.

Landsstýrismaðurin hevur onga heimild at broyta í kunngerð svartkjaftabýtið í sjófeingislógini, sigur løgfrøðingurin.

Annfinn Olsen, reiðari og nevndarlimur í Nótaskipum, segði við Útvarpið 24. apríl, at limirnir í felagnum umhugsa at stevna landsstýrinum.