Bretar vísa Merkinum heiður og leggja krans

Í sambandi við, at tað í morgin eru 85 ár síðan Merkið varð viðurkent sum føroyskt flagg, fer umboð fyri bretsku sendistovuna í danska kongsríkinum í morgin at leggja krans á nýggja kirkjugarðinum í Havn og í Miðvági.

Veteranar frá The Cameronians, sum var bretski herflokkurin, ið gjørdi tænastu í Føroyum undir seinna heimsbardaga, verða eisini til staðar.

Kransur verður lagdur til minnis um tey, sum lótu lív undir seinna heimsbardaga, í kirkjugarðinum við Velbastaðvegin í Havn klokkan 12 og í kirkjugarðinum í Miðvági umleið klokkan 17.30.

Eisini fer ein bretsk sekkjapípa at vera við í flaggdagsskrúðgonguni í Havn.

Tað vóru bretar, sum av fyrstan tíð viðurkendu Merkið sum føroyskt flagg, tí føroysku skipini ikki longur kundu sigla við donskum flaggi orsakað av krígnum.

Í eini almennari viðmerking í tíðindaskrivi sigur bretska sendikvinnan í Danmark, Joëlle Jenny, seg fegnast um, at bretar kunnu vera við til at hátíðarhalda føroyska flaggið.

"Merkið er eitt týðandi súmbol í okkara felags søgu, og eg eri errin av leiklutinum, sum Sameinda kongsríkið hevur spælt í føroysku tjóðarsøguni. Okkara felags søga er grundarlagið fyri einum sterkum felagsskapi, har vit arbeiða saman fyri eini blómandi og tryggari framtíð," sigur bretska sendikvinnan.

hermannagravir.jpg

Hermannagravir í kirkjugarðinum við Velbastaðvegin í Havn. Bretar fara í morgin at leggja krans í kirkjugarðunum í Havn og í Miðvági til minnis um tey, sum lótu lív undir seinna heimsbardaga (Mynd: torshavn.fo)