Fólk skulu heiðrast fyri merkisvert arbeiði ella gerning

Føroyar skulu nú kunna formliga heiðra fólk fyri merkisvert arbeiði ella gerning, sum gangar landi og fólki, og tænir Føroyum.

Tað ætla seks tingfólk, sum hava lagt fram uppskot til samtyktar um tað.

Tað eru tingfólk bæði í samgongu og andstøðu, sum hava lagt uppskotið fram.

Tey siga í viðmerkingunum, at ynskið er, at løgmansskrivstovan setur eitt arbeiði í gongd um, hvussu ein slíkur heiður kann skipast, og hvørjar reglur skulu vera galdandi fyri tilnevning og vali av teimum, sum fáa heiðurin, og sum kann vera í fleiri stigum.

Fleiri stig í øðrum londum

Uppskotsstillararnir vísa á, at í Grønlandi er heiðurin skipaður í tveimum stigum. Íslendski Falkaheiðurin verður latin í fimm stigum, meðan norðanlondini Danmark, Noreg, Svøríki og Finland hava riddarakrossskipanina, ella líknandi.

Fyrsta stigið skal vera at seta fólk, sum hava røttu førleikarnar til at gera eitt uppskot um, hvussu heiðurin kann skipast, og síðani skal løgmaður leggja lógaruppskot fyri tingið, siga uppskotsstillararnir.

Tey, sum hava lagt uppskotið fram, eru Bjørt Samuelsen, Ruth Vang, Kristin Michelsen, Helgi Abrahamsen, Christian Andreasen og Bill Justinussen.