Ungdómsting í næstu viku

Um eina viku verður ungdómstingið 2022.

Tað verður mánadagin og týsdagin í næsta viku.

Løgtingsformaðurin beyð í juni í fjør næmingunum í framhaldsdeild fólkaskúlans at senda inn lógaruppskot ella uppskot til samtyktar at viðgera í ungdómstinginum.

Tá freistin var úti, høvdu 19 skúlaflokkar sent uppskot inn. 

Uppskotini eru um millum annað farsóttarlóg, samferðslu, rúsdrekka og skúlaviðurskifti.

32 næmingar manna tingið

32 næmingar í Eysturskúlanum, Hoyvíkar skúla, Kollafjarðar skúla, Runavíkar kommunuskúla, skúlanum á Fløtum, skúlanum á Giljanesi, Tvøroyrar skúla og Vágs skúla vera í ungdómstinginum.

Seinnapartin týsdagin eru ófráboðaðir fyrispurningar á skránni, har sum ungdómstinglimirnir sleppa at seta løgmanni og landsstýrismonnum spurningar.

Hetta er áttanda ferð, at ungdómsting verður hildið í Føroyum.