Hjálparpakkin kemur ikki fyrr enn í næstu viku

Hjálparpakki 3 kemur ikki í løgtingið fyrr enn í næstu viku.

Tað er greitt, nú vikan fer at halla, og lógaruppskotini ikki enn eru farin úr aðalráðunum, sum varða av teimum.

Í Vinnumálaráðnum og Mentamálaráðnum verður framvegis arbeitt við lógaruppskotunum, men tað arbeiðið er nú um at vera liðugt.

Síðani skulu lógaruppskotini endaliga góðkennast á landsstýrisfundi, áðrenn tey verða latin løgtingsskrivsstovuni til eftirkanning.

Tíðliga í næstu viku

Bæði í Vinnumálaráðnum og Mentamálaráðnum verður tí mett, at lógaruppskotini, sum eru grundarlag undir hjálparpakka-3, í fyrsta lagi verða løgd fram í løgtinginum tíðliga í næstu viku.

Um løgtingið vil tað, so kunnu frávik gerast frá tíðarfreistunum í løgtinginum, so hjálparpakkin kann avgreiðast skjótt.

Hjálparpakki 3 er fyrst og fremst ætlaður ferðavinnufyritøkum, men fevnir eisini um mentan og list, har tað skal bera til at søkja um endurgjald fyri staðfestar, mistar útreiðslur.