3.000 eykahermenn boðsendir at basa skógareldum

3.000 fólk frá eykaherinum í Australia eru boðsend í royndini at basa herviligu skógareldunum, sum hava herjað í landinum tær síðstu vikurnar.

Ein ógvisligur skógareldur á vælumtóktu feriuoynni Kangaroo Island hevur nú eisini kravt tvey mannalív, skrivar tíðindastovan Reuters í morgun.

Eitt friðað øki hótt

Tað vátta australsku myndugleikarnir, sum í løtuni stríðast fyri, at halda eldinum burtur frá einum friðaðum øki á oynni.

Sambært løgregluni á staðnum doyðu tey bæði fólkini, tá tey vórðu fangað í einum bili nærhendis býnum Pardana, skrivar franska tíðindastovan, AFP.

Myndugleikarnir á Kangaroo Island stúra nú eisini fyri djóralívinum á staðnum, nú bæði nógvur hiti og vindur er.

3.000 sløkkilisfólk boðsend

– Skaðarnir eru ikki gjørdir upp enn, men vit vita, at skógareldarnir hava fingið fastatøkur á meira enn 100.000 hektarum av jørð, sigur forsætisráðharrin í Suðuraustralia, Steven Marshall.

Hitabrúgvin, sum hevur gjørt tað trupult hjá myndugleikunum at basa skógareldunum, hevur í dag flutt seg norður eftir í Australia, og myndugleikarnir hava eina trupla uppgávu fyri framman.

Australia hevur tí boðsent 3.000 fólk frá eykaherinum í landinum, ið skulu hjálpa til, at fáa tamarhald á teimum nógvu skógareldunum, sum brenna í deilstatunum New South Wales og Victoria.

Vána forsøgn fyri sløkkiliðsfólkini

Tað upplýsti ráðharrin í verjumálum, Linda Reynolds, fyrr í morgun okkara tíð, sambært australska blaðnum, The Sydney Morning Herald.

– Hetta er helst fyrstu ferð í søguni, at eykafólk eru boðsend at basa skógareldum soleiðis, sigur ráðharrin í verjumálum sambært blaðnum.

Dagurin í dag verður trupul fyri sløkkiliðsfólkini. Veðurforsøgnin sigur frá turki, 40 hitastigum og nógvum vindi - bæði í New South Wales og Victoria, sambært tíðindastovuni, Reuters.