Takkar fyri seg

Gunnar í Liða hevur tikið seg úr nevndini í TF Holding. Gunnar í Liða hevur verið stjóri í Tryggingarfelagnum í nógv ár og síðani nevndarformaður í TF Holding.

Fyri einum ári síðani var nakað, sum minti um eitt kvett, framt í umboðsráðnum og hann var nærum ikki afturvaldur í nevndina.

Formansvalið varð kolldømt

Valda nevndin kundi ikki semjast um ein formann men atkvøðurnar stóðu á jøvnum. Gunnar í Liða brúkti formannsessin til at taka eina avgerandi atkvøðu og var í fyrstu atløgu sitandi sum formaður

Men Skráseting Føroya kolldømdi formansvalið. Nevndin í TF Holding fekk boð um at velja formann við lutakasti. Lutakastið fall á Arna Brattaberg, sum varð afturvaldur eftir aðalfundin tann 21. apríl.

Í telduposti til nevndina í TF Holding hevur Gunnar í Liða tikið seg heilt úr nevndini í gjár. Í morgin skal nevndin í TF Holding velja nýggja nevnd í Eik, har Gunnar í Liða eisini situr.