Seks verkætlanir fingið pengar frá Fiskimálaráðnum

Seks verkætlanir hava fingið pengar frá Fiskimálaráðnum av játtanini til fiskivinnuroyndir í 2015. Harafturat hava fimm verkætlanir, sum longu er byrjaðar, fingið fleiri pengar.

Játtaðar eru knappliga tríggjar milliónir krónur. Søkt varð um 4,8 mió. kr. Játtanin til fiskivinnuroyndir er nógv minkað seinastu árini. Hon var dupult so stór fyri fýra árum síðani.

Hugurin at søkja um stuðul er eisini minkaður. Í ár komu níggju umsóknir, tær vóru 17 í fjør, 27 í 2013 og 32 í 2012. Endamálið við fiskivinnuroyndum er at menna føroyska fiskivinnu við praktiskum, vinnuligum og vísindaligum royndum og kanningum.

Trý øki raðfest

Árini 2013-2015 eru trý øki raðfest, tey eru royndarveiða og virðisøking og burðardyggur fiskiskapur. Triðja raðfestingin er búskaparlig og samfelagslig menning av fiskivinnuni.

Hon kann vera fyrisitingarligar, fíggjarligar, hagfrøðiligar, samfelagsligar ella búskaparligar kanningar ella greiningar, sum leggja aftur at vitanini um fiskivinnuna, og soleiðis menna grundarlagið undir vinnuligum og politiskum avgerðum.

Sambært Fiskivinnugransking í Fiskimálaráðnum er stuðulin, sum søkt verður um, bara lítil partur av tí, sum verkætlanirnar kosta, knappliga 20 prosent. Seinastu árini hevur dentur verið lagdur á at fáa vinnufyritøkur at vera við.

Í ár fingu vinnufyritøkur 58 prosent av stuðlinum, sum varð játtaður. Havstovan fekk 28 prosent og onnur, so sum Heilsufrøðilga starvsstovan og Fróðskaparsetrið, fingu 14 prosent.