Árligu barnakonsertirnar hjá Symfoniorkestrinum væl vitjaðar

Á hvørjum ári hevur Føroya Symfoniorkestur barnakonsertir fyri øllum børnum og í ár er einki undantak. Á skrá er filmstónleikur og onnur løg, ið fólk kenna. Hesuferð er tónleikaævintýrið "Veiða Vind" eisini á skrá. Rakel Helmsdal er rithøvundur, Kári Bæk hevur komponerað og Janus á Húsagarði eigur tekningarnar. Tað er Bernharður Wilkinson stjórnar orkestrinum og Anfinn Heinesen er frásøgufólk. 

Tað er altíð stuttligt at spæla barnakonsertirnar, tí børnini eru væl við og samspæli millum áhoyrarnar, orkestur og frásøgufólk er nakað heilt serligt, tá børnini fylla áskoðaraplássini, siga Bernharður Wilkinson, dirigentur, og Martin Mouritsen, spælari í orkestrinum. Barnakonsertirnar eru týdningarmiklar, tí tær læra børn um tónleik og leggja lunnar undir møguligar komandi spælarar í Føroya Symfoniorkestri, sigur Hans Petur í Brekkunum, stjóri í Føroya Symfoniorkestri.