
- Tíðindi, mentan og ítróttur
Sement fostrar næstu føroysku tónleikastjørnurnar

Á FMA í Varpinum herfyri varð vinnarin av Sement í fjør, Gówa, heiðrað sum ársins spíri.
Og tað er ikki so undarligt, at vinnarin av Sement-tónleikakappingini, sum Tórsgøta skipar fyri í Reinsarínum í Havn, fær hendan heiður.
Sement, sum í ár verður fyriskipað fyri 16. ferð, er staðið og tiltakið, har næstu føroysku tónleikastjørnurnar verða føddar.
Leygarkvøldið fer Sement 2025 av bakkastokki, tá fyrsta umfar verður í Reinsarínum í Havn.
Lopfjøl inn á tónleikapallin
Tað er ikki av leið, tá fyriskipararnir bjóða áhoyrarum at koma í Reinsaríið at fáa eina smakkiroynd av framtíðini hjá føroyskum tónleiki.
Endamálið við Sement er at geva einstaklingum og bólkum eina lopfjøl inn á tónleikapallin, og felagsnevnarin er nýggjur og spennandi tónleikur, ið ikki er útgivin áður.
Og hetta hevur riggað, síðani tiltakið fór at bakkastokki fyrstu ferð í 2010.
Sangbólkurin SWAY hevur luttikið í Sement (Mynd: Bjarni Árting Rubeksen)
Um tú hyggur eftir Sement-vinnarunum hesi árini, ið tiltakið er fyriskipað, so hevur Sement víst seg at vera ein góð lopfjøl út á føroyska tónleikapallinum hjá teimum, ið vinnan.
Nevnast kunnu eitt nú nøvn sum Hamferð, Aggrasoppar, Marius DC, Joe & The Shitboys og Tamara, sum øll hava vunnið Sement.
Einstøk nøvn, ið hava vunnið Sement, eru ikki so virkin longur, eitt nú Reality Bites. Men á odda fyri Reality Bites stóð Dania O. Tausen, ið nú er eitt kent navn á føroyska listapallinum.
Sama kann sigast um Blusette, sum vann Sement í 2016. Oddafólk í Blusette vóru Marianna Winter og Ragnar Finsson, sum bæði er sera virkin á heimliga tónleikapallinum.
Trygvi Danielsen, ið vit í dag kenna sum Silvurdrongur og lim í Aggrasoppum, var oddamaður í bólkinum The Abesent Silver King, sum vann Sement í 2013.
Hóast Ása Helena Brynjarsdóttir ikki vann Sement í fjør, so vann hon møguleikan at spæla á Spot-festivalinum í Århus, ið gjørdist eitt gjøgnumbrot
Eisini nøvn, sum hava luttikið í Sement uttan at vinna, hava fingið sítt gjøgnumbrot við luttøkuni, eitt nú RSP, Benjamin Rajani og Ása Helena Brynjarsdóttir.
Treytir fyri at luttaka
Kappingin er ætlað føroyskum tónleikarum og bólkum, og treytirnar fyri at luttaka á Sement eru hesar:
- Bólkurin ella einstaklingurin skal vera føroyskur ella staðsettur í Føroyum.
- Hvør framførsla er á 15 minuttir.
- Øll løgini skulu vera egin løg og ikki útgivin áður.
- Tónleikarar kunnu spæla í trimum bólkum, men bert tveir tónleikarar kunnu ganga aftur í somu bólkum.
- Hevur tú vunnið Sement, skulu tað ganga fimm ár, áðrenn tú aftur kann luttaka við sama bólki.
Átta luttakarar í fyrsta umfari
Heili átta bólkar og einstaklingar fara at framføra í fyrsta umfari í Sement, og tað er nógv.
- AWL
- Gjáir
- Karla Hansen
- Ókendir
- Solstice
- Doysin
- Jarhzé
- Novacaine
Vertur er Filip Mortensen fyri Sement í ár, meðan dómararnir eru Elinborg Pálsdóttir, Michael Antony Charles, Kristian Blak, Jenný Kragesteen og Danny Baldursson.
Sement-vinnarar
2024: Gówa
2023: Aggrasoppar
2022: Marius DC
2021: Joe & The Shitboys
2020: Tamara
2019: Reality Bites
2018: Fróði Bjarnason
2017: Jasmin
2016: Blusette
2015: Konni Kass
2014: Lyon and The Color Storm
2013: The Absent Silver King
2012: Sleepless Ghosts
2011: Guðrun & Bartal
2010: Hamferð
Marius DC vann Sement í 2022 (Mynd: Bjarni Árting Rubeksen)
Kringvarpi Føroya fer at senda frá Sement í sjónvarpinum og á heimasíðu Kringvarpsins, eins og gjørt hevur verið seinastu árini. Vertir fyri sendingini vera Birita Matras Petersen og Rebekka Manuela Behrens.