Frítekst tagging:
- Tíðindi, mentan og ítróttur
Vetrarjazz 2025: Í tónlistarliga kringrás við kosmiskum progjazzi úr Ísrael
Vetrarjazz 2025: Í tónlistarliga kringrás við kosmiskum progjazzi úr Ísrael
UMMÆLI: Eitt forkunnigt navn á ársins Vetrarjazzi var ísraelski progjazz-bólkurin Yuval Ron Trio í OY. Myndir: Bjarni Árting Rubeksen
03.02.2025 - 14:36
Í sambandi við árliga Vetrarjazz-festivalin hjá Havnar jazzfelag, ið hevur verið fyriskipaður í høvuðsstaðnum seinastu vikuna, fór ísraelski gittarleikarúrmælingurin Yuval Ron á pallin í OY fríggjakvøldið saman við bólki sínum Yuval Ron Trio.
Tónleikurin hjá Yuval Ron Trio er bæði egin og egin. Egin tí talan er um eina sjáldsama samanrenning av jazzi, rokki og øðrum tónleikasløgum, ið saman skapa eitt egið úttrykk. Og egin, tí Yuval Ron hevur skrivað allan tónleikin sjálvur.
Tað er ikki av tilvild, at limirnir í Yuval Ron Trio eru í rúmdarbúnum á pallinum, tí tónleikurin minnir til tíðir ikki sørt um ljóðbandið til onkran Sci-Fi B-film frá sjeytiárunum. Tónleikurin er eins hugtakandi, sum hann er kitsj. Hann gongur á smølu rókini millum tað kula og kiksaða, men helti í stóran mun á kula-bógvin.
Konsertin við Yuval Ron Trio í OY var sera hugtakandi og væl uttanfyri tað, ið vit vanliga fáa høvi at hoyra her á landið ein vanliga vetrardag í januar. Júst tí er tað so umráðandi við festivalum sum Vetrarjazz, sum í ár tóktist hava eina væl meira spennandi skrá enn undanfarin ár.
Yuval Ron Trion er samansett av tónleikarum, ið eru úrmælingar á sínum ljóðførum.
OY hevur gjørt stórar íløgur í útgerð, fyri at kunna húsa konsertum, og bryggjaríið er vorðið millum frægastu spælistøð í landinum.
Tað gongur við tí rúkandi ferð, tá Yuval Ron Trio framføra. Tónleikurin er á tremur við harmonium og rútmuskiftum, sum verða broðreitt sum ein spennandi súpan av gittara, bassi, trummum og teldubornum tónum.
Yuval Ron byrjaði at spæla gittar sum 11 ára gamal, og tað tók ikki langa tíð, áðrenn hann spældi við lokalum bólkum og byrjaði at skrivað egnar sangir.
Konsertin í OY fríggjakvøldið var ein tónlistarlig kosmisk ferð út har vit ikki vanliga ofta fara ella sleppa.
Progressiviteturin hjá Yuval Ron Trio gjørdi, at tónleikurin fevndi um eitt sindur til øll, tí har vóru løtur við jazzi, rokki, poppi, hørðum rokki og øðrum sjangrum.
Yuval Ron Trio gjørdu eisini eina heiðurliga roynd at fáa áhoyrararnar at klappa við til eitt av løgunum. Men tað var lættari sagt enn gjørt, og segði ikki so litið um, hvussu listafínur tónleikurin hjá Yuval Ron er.
|
|
Er kopiera
