Høgligari busssamband til Miðnám í Vestmanna

Á Miðnámsskúlanum í Vestmanna hava tey leingi viljað havt eitt betri busssamband, so tað verður høgligari hjá næmingum aðrastaðni frá at ganga í skúlanum. 

Og nú hevur skúlin fingið tilsøgn frá Strandferðsluni um, at busssambandið hjá Bygdaleiðum verður broytt til tað betra.

Miðnám í Vestmanna

Stóri trupulleikin hjá Miðnámsskúlanum í Vestmanna hevur verið og er, at tað er so óhøgligt at brúka bussarnir hjá Bygdaleiðum at koma til og úr skúla. Nógvir næmingar mugu skifta millum fleiri bussar, og tað merkir, at nógv tíð fer við at bíða eftir næsta bussinum.

Virkandi rektarin, Fróði Skúvadal, fegnast um hetta og vónar, at broytingarnar fara at síggjast aftur í undirtøkuni fyri skúlanum.

Hoyr innslag í útvarpstíðindunum: 

Nakrir og 70 næmingar ganga í løtuni á Miðnámsskúlanum í Vestmanna.