Borðtennistalent gull í danskari A-kapping

Bert 12 ára gamli Rasmus Teitsson í Skorini var sera vælupplagdur, tá hann vann gull í danska A-borðtenniskapping í Roskilde um vikuskiftið.

Hann var ikki til at steðga, skrivar btsf.fo, og vann 17 av teimum fyrstu 17 dystunum ímóti fleiri av stinnastu donsku spælarunum í U13-aldursbólkinum. 

Góða spælið gav honum gull í "yngre drenge A" og "herre junior C" og bronsu í "Drenge B". Hetta er fyrstu ferð í mong ár, at ein føroyingur hevur megnað at vunnið gull í einari danskari A-kapping og bara aðruferð yvirhøvur, skrivar Borðtennissambandið.

Elsa Kathrina Gisladóttir vann gull í "dame ungdom B". Bogi Gardar Bringsberg, Hadassa S. Christiansen, Jósva F. Højgaard og Suni á Lava vóru eisini við í Spar Nord Cup í Roskilde.