Høgni Hoydal: Málið er at styrkja okkara beinleiðis samstarv við USA

Mikudagin kemur amerikanski herflotaráðharrin Carlos Del Toro á vitjan í Føroyum.

Landsstýrismaðurin í uttanríkis- og vinnumálum, Høgni Hoydal, er vertur.

"Landsstýrið hevur leingi roynt at fingið júst Carlos Del Toro henda vegin, tí vit vilja styrkja okkara beinleiðis samstarv við USA, ikki minst í sambandi við trygdarstøðuna í Norðurhøvum," sigur Høgni Hoydal, landsstýrismaður í uttanríkismálum.

Mikudagin hava landsstýrismaðurin og herflotaráðharrin fund, har teir millum annað fara at tosa um trygdarstøðuna í Norðurhøvum, samstarv og viðurskifti landanna millum.

Herflotaráðharrin skal eisini hitta uttanlandsnevndina og vitja Vørn, MEST, Arktis Kommando og Atlantic Airways. 

Carlos Del Toro fer av landinum aftur hósdagin.