Vitni: Vit varskógvaðu løgregluna um byrsumannin

Tað var leygardagin, at forsetavalevni, Donald Trump, var raktur av skotum í oyrað, tá ið ein maður skeyt eftir honum á einum valfundi í Milwaukee leygardagin. 

Vitni greiða nú frá, at tey stutt áðrenn skottilburðin sóu ein mann við byrsu grulva á einari tekju. Greg Smith var ein teirra, sum sá byrsumannin á tekjuni. 

 - Hann hevði eina byrsu, og vit peikaðu eftir honum. Vit varskógvaðu løgregluna um tað, men tað tóktist sum, at løgreglan einki skilti, segði Greg Smith, vitni, millum annað við BBC: 

Kelda: AP // BBC

20 ára gamal byrsumaður

Eitt fólk á veljarafundinum lat lív, og tvey vóru flutt á sjúkrahús við álvarsligum skaða. 

Løgreglan skeyt og drap gerningsmannin, sum síðani er eyðmerktur at vera 20 ára gamli Thomas Matthew Crooks úr Pennsylvania. 

Skotvápnið, sum hann brúkti, var keypt á lógligan hátt í USA.

Thomas Crooks drápsmaður skottilburður

Mynd: Aaron Josefczyk/Reuters/Ritzau Scanpix

Broyta ikki mannagongdirnar

Lívverjutænastan Secret Service, sum tekur sær av trygdini hjá bæði sitandi og fyrrverandi forsetum, sigur, at tey broyta ikki mannagongdir fyri landsfundir.

- Vit eru trygg við mannagongdirnar fyri slík tiltøk, og vit eru til reiðar. Vit halda ikki, at neyðugt er við broytingum í trygdini, segði samskiparin hjá Secret Service, Audrey Gibson, á tíðindafundi.