Kostar 18 mió. kr. at umvæla Ternuna

Tað kostar 18 mió. kr. at umvæla Ternuna.

Í fjør vórðu brúktar 3,5 mió. kr.   Í fíggjarlógini fyri 2021 eru fýra milliónir.

Men nú verður biðið um 10,5 mió. kr. afturat, tí nú er umvælingin mett at kosta 18 mió. kr.

Ternan fór til eftirlit á Klaksvíkar sleipistøð í oktober í fjør. Hon skuldi vera liðug á jólum.

Tann ætlanin helt ikki, tí so hvørt sum skipið varð kannað, komu boð um ábøtur frá klassanum, og síðani hálvan januar hevur øll umvælingin verið sambært krøvum frá klassanum.

Liðug fyrst í mai

Einaferð var boðað frá, at skipið skuldi vera liðugt á páskum. 

Seinasta metingin segði, at skipið skuldi aftur í sigling um Nólsoyarfjørð millum hálvan og 20.apríl.

Men tað verður heldur ikki, og metingin nú er, at Ternan verður liðug fyrst í mai.

Ritan kostaði eisini meira enn ætlað at umvæla.

Í uppskotinum um eykajáttan, sum kom í tingið í gjár, verður biðið um 1,3 mió. kr. til ta umvælingina.