Metnógv smittað við koronu í Danmark

Metnógv eru smittað við koronu í Danmark. Seinasta samdøgrið hava 1.745 danir fingið koronusmittuna. Tað vísa nýggjastu tølini hjá danska Statens Serum Institut. 

Hetta er hægsta talið av smittaðum innan fyri 24 tímar, síðani korona byrjaði at gera um seg í Danmark í vár. 

23 danir vóru innlagdir seinasta samdøgrið og samlaða talið av innløgdum við koronu er nú 302. 42 teirra eru innløgd á intensivari deild, og 26 sjúklingar fáa hjálp frá andingartólum.

Høga smittutalið fær danir at stúra fyri jólunum

Í dag hava framsøgufólk úr øllum politisku flokkunum verið á fundi við Magnus Heunicke, heilsumálaráðharra, um koronustøðuna. Tí verða herd tiltøk væntandi sett í verk ein av komandi døgunum. 

– Vit síggja ein vøkstur sum er eksponentiellur, og tí er tað alneyðugt við herdum tiltøkum, men tiltøkini verða møguliga avmarkað lokalt, sigur Peder Hvelplund úr Eindarlistanum.

Mette Frederiksen hevur í dag skrivað á Facebook, at nýggj tiltøk eru á veg.