Fótbóltshallir framvegis í nevnd

Fótbóltshallirnar eru framvegis í Mentanarnevndini. Eitt uppskot um at taka málið úr nevndini, hóast einki álit er skrivað, fall í dag.

Men tað var ikki meira enn so, at tað fall. Uppskotið fekk 16 atkvøður fyri og 16 ímóti. 

Tingmenninir Bill Justinussen og Jákup Mikkelsen eiga uppskotið um fótbóltshallir. Tað varð lagt fram 20. september og fór í Mentanarnevndina 8. oktober.

Fekk freist

Nevndin fekk freist frá løgtingsformanninum til 20.januar at koma við áliti. Men einki álit er komið enn.

Tingmenninir báðir skjóta upp, at landskassin rindar helvtina, tá fótbóltshøll verður bygd. Fótbóltshallir hava verið í tinginum fyrr. 

Í tingsetuni 2014 fall uppskot til samtyktar um almennan stuðul til at byggja hallir. Í undanfarnu tingsetu fall málið burtur, tá tingsetan 2017 endaði á ólavsøku í fjør.