Sambandsflokkurin: »Ja« til felagsleiðslu

Á landsfundi floksins leygardagin segði formaður floksins, Bárður á Steig Nielsen, at felags leiðsla í øllum sjúkrahúsverkinum er eftir hansara tykki skilagóður tanki. 

Hann staðfesti tí tað, sum undanmaður hansara, Kaj Leo Holm Johannesen, segði fyri tveimum árum síðani. Hann segði tá, at vit skulu hava eitt heilsuverk og eina leiðslu.

Men Sambandsflokkurin er rúkandi ósamdur við samgonguna um stjórnarskipanina. Støðan hjá Sambandsflokkinum er krystallklár, segði Bárður á Steig Nielsen á landsfundinum leygardagin.  

Halda seg til ásetingar í grundlógini

- Vit halda okkum sjálvandi til felags grundlógina í ríkinum, segði formaður Sambandsfloksins. Eingin skal ivast í, at Sambandsflokkurin stríðist av øllum alvi móti tjóðveldisgrundlógini, segði Bárður á Steig Nielsen. 

Føroyar kunnu ikki hava tvær grundlógir, segði hann. Formaðurin í Sambandsflokkinum legði eisini samgonguna undir at taka uppskotið hjá Sambandsflokkinum um fiskivinnunýskipan og gera tað til sítt egna uppskot. 

- Vit kunnu velja at kæra okkum um, hví samgongan fyrst kopierar okkara skipan og síðani avbronglar hana, segði Bárður á Steig Nielsen og legði afturat, at ella kunnu vit fegnast um, at okkara skipan hevur vunnið hevd, og so brúka komandi tíðina til at rætta skeivleikarnar, sum samgongan hevur kroyst inn í okkara skipan.   

- Lat tað vera púra greitt, segði formaður Sambandsfloksins, Sambandsflokkurin hevur ikki havt sum mál at hjálpa samgonguni við at yvirliva í málinum um fiskivinnunýskipan.