572 fleiri løntakarar

Í november 2016 vóru 25.525 løntakarar. Hetta eru heili 572 fleiri enn í november 2015.

Tað skrivar Hagstovan á heimasíðuni.

Við løntakarar sipar hagstovan til øll fólk í aldrinum 16 til 74 ár, sum hava havt eina lønarinntøku, sum er í minsta lagi ein dagsløn um mánaðin, og sum er skrásett í skattaskipanini.

Vøkstur hvørt ár síðan 2013

Síðan 2013 hevur tað verið ein stórur vøkstur í løntakaratalinum hvørt ár. Og vøksturin í ár er lægri enn vøksturin undanfarin ár.

Hóast yvirskipaða vøksturin, so eru ávísar vinnugreinar, øki og aldursbólkar, sum hava afturgongd í løntakaratalinum.

Tað var í 2007, at tað vóru flestir løntakarar, næstan 26.000. Men eftir fíggjarkreppuna í 2008 minkaði talið við 2.500 løntakarum fram til 2011. Tá vóru 23.300 løntakarar. Ikki fyrr enn í 2014 kom verulig framgongd aftur. Nú hevur verið stórur vøkstur í trý ár á rað, og arbeiðsmarknaðurin er næstan komin á sama støði sum hann var í 2007.

Størst framgongd í byggivinnuni

Millum vinnugreinarnar hava bara fiski- og alivinnan havt afturgongd í løntakaratalinum. Har er afturgongdin 0,2 prosent.

Í byggivinnuni er størsta lutfalsliga framgongdin. 184 fólk fleiri arbeiddu í byggivinnuni 2016. Tað er ein vøkstur á heili 5,3 prosent. Byggivinnan var helst tann vinnugreinin, sum var harðast rakt av fíggjarkreppuni í 2008.

Í privatu tænastuvinnuni var eisini ein lítil vøkstur, men størsti vøksturin í tali var innan almennar tænastur, har løgdust 290 fólk afturat í 2016 í mun til árið fyri.

Suðuroyggin haltar enn

Framgongdin ger seg galdandi í øllum sýslum uttan Suðuroyar sýslu. Har var at kalla ongin broyting, hvørki til tað betra ella til tað verra.

Størsta framgongdin í tali var í Streymoyar sýslu, men størsta lutfalsliga framgongdin var í Sandoyar og Vága sýslu.

Framgongd var tó í øllum aldursbólkum, og har er tað serliga merkisvert, at fleiri og fleiri pensjónistar eru løntakarar. Henda gongdin hevur gjørt seg galdandi síðan 2005, og hon kemur av, at arbeiðsstyrkin sum heild gerst eldri. Av somu orsøk eru eisini færri fólk undir 40 ár, sum eru løntakarar í mun til 2007, tá ið talið var hægst.

Kynsbýttur arbeiðsmarknaður

Hóast talið á manligum og kvinnuligum løntakarum ikki liggja langt frá hvørjum øðrum, er føroyski arbeiðsmarknaðurin sera kynsbýttur, tí tað er enn stórur munur á, hvar kvinnur og menn arbeiða.

Kvinnurnar eru í stórum meiriluta í almennum tænastum, tað verið seg heilsu- og almannaverk og hjá kommunum. Hinvegin eru næstan bara menn, sum til dømis byggja og fiska.

Í fiskavøruídnað, undirvísing, handli og umvæling er kynsbýtið meira javnt.

Tølini á løntakarum benda á, at tað er javnt býtt millum kynini, men lønarútgjaldingar vísa, at mennirnir vinna 60% av lønini meðan kvinnurnar vinna 40%. Hetta kemur serliga av, at menn og kvinnur ikki arbeiða líka nógv. Kvinnurnar standa fyri meginpartinum av partstíðararbeiðnum.

Meira nágreiniligar upplýsingar kunnu lesast á Hagstova.fo.