Gera vart við mannagongd

Ein hægri myndugleiki eigur altíð at góðkenna millum annað nevndarsamsýningar. Tað siga løgtingsgrannskoðararnir um roknskapin hjá Búnaðargrunninum.

Løgtingsgrannskoðararnir hava spurt landsstýrismannin, um hann veit, at stýrið í grunninum hevur hækkað sína egnu samsýning, og um stýrið eisini eigur at fáa fundarpengar.

Løgtingsgrannskoðararnir spurdu eisini, hvørja heimild stýrið hevur at áseta sær sjálvum løn og samsýningar.

Stýrið hevur heimild

Landsstýrismaðurin svarar, at stýrið fyri Búnaðargrunnin er, eins og nevndin í einum partafelag, ovasta dagliga leiðsla grunsins.

Stýrið hevur tí heimild til at áseta tær treytir, stýrið virkar undir, herundir sína egnu samsýning. Stýrislimirnir fáa ikki fundarpengar umframt samsýningina.

Bústaðir og Realurin eru í somu støðu, og er samsýningin til stýrislimirnar í Búnaðargrunninum lutfalsliga lágt samanborið við hesar báðar, sigur landsstýrismaðurin.

Løgtingsgrannskoðararnir halda tó framvegis, at tað er skeivt, at tey, sum umsita almennar pengar, kunnu játta til sín sjálvs. Tí eigur hægri myndugleika at góðkenna samsýningar.