Gongd komin á byggivinnuna í Føroyum aftur

Verulig framgongd innan byggivinnuna í Føroyum hómast nú fyri fyrstu ferð síðan fíggjarkreppuna. Talan er um størstu framgond seinastu seks árini

Framgongd hómast nú innan byggivinnuna í Føroyum. 30 milliónir krónur fleiri eru higartil útgoldnar í lønum innan byggivinnuna í mun til sama tíðarskeið í 2013 (tilvildarlig savnsmynd)

Mynd: KvF

Bjarni Mohr

11.05.2014 - 09:41

Higartil í ár eru útgoldnar 2.389 milliónir kr. í lønum í Føroyum. Tað eru 101 milliónir krónur fleiri enn somu mánaðar í fjør. Framgongdin hetta tíðarskeiðið var 4,4%.

Tað er í løtuni framgongd í øllum høvusðvinnugreinum, men serliga í byggivinnuni. Higartil í ár hevur byggivinnan útgoldið 290 milliónir kr. í lønum, tað eru 30 milliónir fleiri enn í fjør - framgongdin er 11,5%.

Hetta er fyrstu ferð, byggivinnan hevur veruliga framgongd síðan fíggjarkreppuna, men framvegis er ikki alt vunnið innaftur síðan besta árið hjá byggivinnuni í 2008, skrivar <a href="http://www.hagstova.fo/fo/tidindi/2014/05/storur-vokstur-i-lonarutgjaldi... target="_blank">Hagstovan</a>.

Árstíðarjavnaðu lønirnar vísa, at lønirnar í løtuni eru á sama stigi sum seinasta heyst, einar 620 milliónir kr. um mánaðin. Gongdin vísir, at framgongdin - sum er í løtuni - byrjaði fyri einum ári síðan.