Ungfólk í Danmark fáa serligt tilboð um ráðgeving móti harðskapi

Ung í nøkrum donskum kommunum, sum eru rakt av harðskapi, fáa nú eitt serligt tilboð um dulnevnda ráðgeving.

Kreppumiðstøðin í Holstebro byrjar nú tað fyrsta ráðgevingartilboðið av hesum slag, skrivar danska kringvarpið.

Talan er um ráðgeving til ung millum 14 og 17 ár, sum eru fyri sálarligum ella likamligum harðskapi.

Tilboðið hevur fingið heitið "Ung uttan harðskap."

Størri vandi á ferð

Kanningar vísa, at harðskapur í barnaárunum veksur um vandan fyri at verða fyri harðskapi í parlagi seinni í lívinum. Lítið sjálvsvirði og einsemi eru eisini kendar avleiðingar.

Leiðarin á Kreppumiðstøðini í Holstebro, Karin Houman, sigur seg vóna, at nýggja tilboðið fer at kunna fyribyrgja, at ungar gentur og ungir dreingir koma sær í eitt harðligt parlag.

- Tá tú ert 14 til 17 ár, fært tú tínar fyrstu parlagsroyndir. Við at veita ráðgeving tíðliga, kunnu vit vónandi fyribyrgja, at færri ung enda í harðligum parløgum, har samskiftishátturin millum tvey fólk er harðskapur, sigur hon við DR.