Mentanarvirðislønir landsins verða handaðar í kvøld

Í kvøld fer Sirið Stenberg, landsstýriskvinna í almanna- og mentamálum, at handa virðislønir landsins til lista- og mentafólk fyri árið 2023 - tað, sum á mannamunni verður kallað Mentanarvirðislønir landsins. 

Hetta hendir í Miðnámi í Vestmanna, sum heldur til á Fjarðavegi 4, í kvøld klokkan 19.

Tríggjar virðislønir verða handaðar:

• Mentanarvirðisløn landsins, sum er 150.000 kr. Hon verður latin fyri at heiðra føroyskt mentafólk sum tøkk fyri útint listarligt avrik.
• Heiðursgáva landsins, sum er 75.000 kr. Hon verður latin teimum, ið hava virkað til frama fyri mentanarlig virði, sum hava týdning fyri føroyska mentan, list og mentanararv.
• Serstøk virðisløn, sum er 50.000 kr. Hon verður latin listafólki, mentafólki ella felagsskapi eftir landsstýrisfólksins egnu avgerð.

Harafturat verður sømdargáva latin, sum er 20.000 krónur um árið. Hon verður latin listafólki, ið hevur útint listarligt avrik, ið verður mett at hava týdning fyri samtíð og framtíð.

Almanna- og mentamálaráðið boðar frá, at tiltakið er alment, og øll eru hjartaliga vælkomin.

Páll Danielsen

Eins og í fjør, so verður tað Páll Danielsen, ið verður vertur fyri tiltakinum. 

Kringvarp Føroya sendir beinleiðis frá tiltakinum í sjónvarpinum og her á heimasíðu Kringvarpsins.