H-bygningurin aftur í løgtinginum í dag

Løgtingið fer í dag at viðgera uppskotið hjá Margit Stórá, landsstýriskvinnu, um H-bygningin hjá Landssjúkrahúsinum.

Landsstýriskvinnan biður um 43,7 milliónir krónur aftrat til bygningin fyri at fáa hann lidnan.

Peningurin skal á fíggjarlógina fyri 2024. 

Og tað kemur hann, sigur Ruth Vang, landsstýriskvinna í fíggjarmálum.

Góðar 13 mió. til innbúgv og tól

Sambært nýggjari kostnaðarmetingin skulu brúkast 14,2 milliónir krónur til bygningsarbeiði, 13,2 milliónir krónur til innbúgv, tól og útgerð, 4 milliónir til streym, reingerð og annan rakstur í byggitíðini, 6,3 milliónir krónur til byggiplássrakstur og 6 milliónir krónur til isolatiónsstovur.

Uppskotið um nýggja verklagslóg um H-bygningin kom í tingið fyri 12 døgum síðani.

Tingfundurin í dag er kl.11.00.