Størri samstarv við bæði USA og ES

Landsstýrið leggur stóran dent á samstarv við USA.

Í 2020 gjørdu Føroyar og USA eina partalagsyvirlýsing um at økja samstarvið. 

Fyrsti partalagsfundur var í Washington DC í februar í ár. 

Sendistovu í Washington

Næsti fundur verður í Føroyum tíðliga í 2024.

Og nógv skal henda í 2024. Føroyar ætla lata upp sendistovu í Washington í vár.

Og ætlanin er at hava mentanarátak í New York í apríl 2024.

Meira fjøltáttað samstarv við ES

Landsstýrið vil eisini menna eitt sterkari og meira fjøltáttað samstarv við ES. 

Ítøkiliga verður arbeitt við nýggjum samstarvskarmi.

Sum liður í at menna viðurskiftini og økja vitanina um Føroyar í ES-skipanini, er ein nationalur serfrøðingur settur í uttanríkistænastuni hjá ES, sum serliga skal arbeiða við viðurskiftunum millum Føroyar og ES.

Horizon Europe

Í fjør gjørdu Føroyar og ES sáttmála um luttøku Føroya í samstarvsætlanum hjá ES.

Hann tryggjar millum annað, at føroyski atlimaskapurin í samstarvsætlanini fyri gransking og menning hjá ES, Horizon Europe, heldur fram. 

Sáttmálin gevur eisini Føroyum møguleika at vera í samstarvsætlanum hjá ES, sum loyva atlimaskapi fyri lond uttanfyri ES.

Arktiskan politikk

Landsstýrið fekk í fjør ein arktiskan politikk. 

Bulurin í arktiska politikkinum eru tey átta høvuðsmálini, trygd og støðufesti, millumtjóða samstarv, umhvørvi, náttúra og veðurlag, gransking, vitanarmenning og útbúgving, tilbúgving, tilfeingi í havinum, vinnumøguleikar og burðardygg menning og mentan og samfelag.

Politikkurin verður í løtuni dagførdur og verður í heyst borin Løgtinginum sum frágreiðing til aðalorðaskiftis.