Føroyar í hálvfinaluni í badminton

Føroyska badmintonliðið hevur spælt seg í hálvfinaluna í liðkappingini á Oyggjaleikum, har mótsøðuliðið verður Guernsey.

Føroyar gjørdu bart sunnudagin og vunnu sannførandi 5-0 sigrar á Orknoyum, Ytru Hebridunum og Hetlandi.

Ímóti Orknoyum vunnu Árant á Mýruni og blaðunga Ranja Joensen sínar dystir í einmansleiki, meðan Fai Yin Wong og Magnus Dal-Christiansen vunnu tvímansleikin hjá monnum og Mia Thorkildshøj og Miriam í Grótinum gjørdu tað sama hjá kvinnum. Blandaða tvímansleikin tóku Jónas Djurhuus og Sanna Thorkildshøj sær av.

Ímóti Ytru Hebridunum vunnu Jónas Djurhuus og Bjarnhild í Buð Justinussen einmansleikin. Tvímansleikin hjá kvinnum vunnu Sanna Thorkildshøj og Bjarnhild í Buð Justinussen, meðan Jónas Djurhuus og Asbjørn Heidi Olsen vunnu hjá monnum. Asbjørn Heidi Olsen og Ranja Joensen vunnu blandaða tvímansleikin.

So var Hetland á skránni, og har var tað aftur Árant á Mýruni, sum vann einmansleiki hjá monnum, meðan møtstøðukvinnan hjá Miriam í Grótinum mátti gevast vegna skaða. Tá var støðan 18-12 til føroyingin. Í tvímansleiki við monnum vunnu Fai Yin Wong Magnus Dal-Christiansen, og Sanna Thorkildshøj og Bjarnhild í Buð Justinussen hjá kvinnum. Í blandaðum tvímansleiki sigraðu Jónas Djurhuus og Mia Thorkildshøj.

Næstan allir dystirnir endaði 2-0, og nú verður spennandi, um føroyingarnir standa seg eins væl ímóti Guernsey klokkan 12.00 mánadagin.