Rudda nú upp eftir Wagner-bólkinum

Russiska trygdartænastan, FSB, er nú farin í holt við at rudda upp eftir Wagner-bólkinum og leiðaranum, Jevgenij Prigosjin.

NRK skrivar, at ein stórur glasbygningur í St. Pætursborg, sum fyrr var høvuðsstøð hjá Wagner-bólkinum í býnum, nú verður ruddaður. FSB leitar eftir prógvum í bygningum fyri at vita, hvør var við í ætlanini hjá Prigosjin um hergonguna til Moskva, og hvør var ímóti. 

Wagner-hermenn, Wagner-bólkurin

Eygleiðarar meta, at Wagner-bólkurin framvegis hevur eina framtíð í Russlandi. (Mynd: Ritzau Scanpix)

Lagt hald á teldur og servarar

FSB hevur eisini verið á vitjan í miðlahúsinum hjá Prigosjin í St. Pætursborg. Har hevur trygdartænastan lagt hald á teldur og servarar. Alt hetta skal vera við til at staðfesta, hvønn Vladimir Putin, forseti, kann líta á og ikki.

Eingir Wagner-hermenn eru nú eftir í Ukraina, men enn er óvist, hvussu ella um tað fer at ávirka kríggið í landinum. Talan er um millum 15.000 og 20.000 royndar og væl vandar hermenn, sum nú ikki longur eru partur av krígsførsluni hjá Russlandi.

Eygleiðarar meta, at Wagner-bólkurin framvegis hevur eina framtíð í Russlandi.

Hevur brúk fyri Wagner-bólkinum

Wagner-bólkurin hevur verið virkin í afrikanskum londum, har hann hevur gjørt sítt til at fremja russiska ávirkan. Harumframt hevur bólkurin eisini góðar cyber-førleikar, og kann brúka teir til at ávirka og skapa split millum londini í vesturheiminum - lond, sum í løtuni stuðla Ukraina við vápnum og pengum.

Tískil hevur Vladimir Putin framvegis brúk fyri Wagner-bólkinum, hóast tað er sannlíkt, at hann fer at revsa teir persónarnar, sum skipaðu fyri uppreistrinum fyri níggju døgum síðani.